Texniki cizgilərin hazırlanmasında sənaye standartı hesab olunan bu proqram; plan, kəsik və fasadların dəqiq ölçülərlə, müəyyən olunmuş normalara uyğun işlənilməsini təmin edir. Azərbaycanda fəaliyyət göstərən hər bir memarlıq və mühəndislik ofisinin gündəlik işində mütləq istifadə etdiyi bu proqram, sahəyə yeni başlayanlar üçün ən doğru seçimdir.

1982-ci ildə işıq üzü görən AutoCAD ilə dizayn dünyası sanki yenidən formalaşdı. Bu gün proqramın müasir versiyaları bulud texnologiyalarını dəstəkləyir və mobil tətbiqlər vasitəsilə əlçatandır. Lakin proqramın əsas fəlsəfəsi dəyişməz qalır: dəqiqlik, standartlara uyğunluq və sənədləşmə. Bir çox ölkədə olduğu kimi, Azərbaycanda da dövlət layihələri məhz AutoCAD formatında təhvil verilir.

Proqramdan istifadə iki əsas istiqamətə bölünür:

• 2D rejimi: Plan, kəsik, fasad və digər texniki sənədlərin hazırlanması üçün nəzərdə tutulub. Azərbaycandakı əksər ofislərin əsas iş aləti məhz bu rejimdir.

• 3D rejimi: Həcmli modellərin qurulması və layihənin ümumi məntiqinin yoxlanılması üçün istifadə olunur. Bu rejim vizuallaşdırmadan daha çox, layihənin həcm strukturunu formalaşdırmaq məqsədi daşıyır.